Acuèlh  >  Vins e gastronomia  >  Los Vins de Brageirac

 Los Vins de Brageirac

 


Grands Vins d’Aquitània : Nosautres los Brageirac !

Lo vinhal de Brageirac constituís un vertadier patrimòni, amb son istòria e sas influéncias notablas sus la cronica dels òmes, l'architectura e las mentalitats. Ric de sas dotze apellacions, aquel terraire es tanben ric de sos paisatges e de sos òmes.

En traversar la Rota dels vins, trobarètz personatges afogats per lor trabalh, amorós de lor ranvèrs e urós de partatjar lor estrambòrd amb los que venon descobrir aquela partida del Perigòrd. D’unes son viticultors dempuèi mai d’una generacion, d'autres dempuei un còp de còr. D’unes son perigordins de pura soca, d'autres an conegut d'autres orizonts, d'autres país, avant de se consacrar a ‘quels vins que son pas coma los autres.

Tots son estacats a la qualitat de lor produccion, per ne’n far la veirina d'un Perigòrd a despart, enquera ligat als confins del Bordalés, mas fòrt de son identitat pròpra.


Un pauc d'istòria

Lo terraire dels vins de Brageirac es lo terraire d'un grand vinhal que pren son origina luènh dins lo temps. Al moment de l'ocupacion anglesa, los viticultors fuguèron exemptats d'una taxa dicha " la presa dels vins ", per fin de facilitar lo comèrci amb l'Anglatèrra. Enric lo tresen, rei d'Anglatèrra, balhava de bon grat de daissatz-passar per se fornir en barricas de vin de Brageirac, atal coma Carles de Valois, lo quite frair de Felip lo Bèl.

Per se distinguir, los vins de Brageirac dispausèron tre lo segle quatorzen de l'autorisacion exceptionala d'apausar un grifon e una torre sus las barricas, coma marca de reconeissença. Pus tard, amb l'arribada de la Refòrma, la Olanda venguèt la practica gaireben exclusiva dels vins de Mont Bazalhac.

Atal, tot lo long de l'istòria, son los grands itineraris d'exportacion que perpetuan la vocacion barrutlaira dels vins de Brageirac : l'Anglatèrra, los País Bas, lo Danemarc, l'Alemanha, la Belgica, lo Luxemborg, mas tanben lo Japon, la Barbada, la China, l'isla de Montserrat… Los viticultors mandan lors produchs sus las taulas dels grands del mond, de restaurants prestigiós, de celebritats, de governaments, segon l’exemple dels mai grands.



L'abús d'alcoòl es perilhós per la santat - A beure amb moderacion

 
 

 
 

Retorn a la pagina d'acuèlh Occitan