|
En País de
Brageirac, gastronomia e vita riman amb mercats.
Quò es aquí, dins un ambient bon enfant e segon un rite
immutable, que cadun poirà descobrir los melhors produchs
locals o l’aisina tan desirada... Tradicionals o “a tèma”,
aquels mercats coneisson pertot una brava capitada, que devon
a la qualitat dels expausants, al prestigi dels sitis sovent,
a la convivialitat ambienta totjorn !
 Bolegadís
e tradicion
Colors, sabors, odors, bolegadís suau...
Fruchas e ortalissas, polalhas, vins, flors, carns e consèrvas,
vestits e esplechs... Los mercats tradicionals del País de
Brageirac son coma aquò : òm i tròba tot, los bons produchs de
nòstres terradors, l’util, lo futil, l’essencial o
l’indispensable. E l’òm i vei de grands-pairs mostachuts,
casqueta vissada sul cap, que comentan los eveniments de la
setmana en s’amagant darrièr un accent rocassut que sent bon
l’occitan. Incontornable, lo mercat setmanièr ritma la vita de
la ciutat en i atirant los abituats, los badaires, los
toristas... A Bèlmont o al Boisson, a La Fòrça, Vilamblard o
Vilafranca-de-Lonchac, son esperit demòra lo mesma : es un
eveniment essencial, consacrat per una larja part al ben viure
e als plasers de la taula. Sol càmbia lo decòr, sovent
prestigiós : plaça centrala d’una bastida, fieiral, plaçòta
d’un vilatge medieval, plaça d’una glèisa romana...
 Per
tots los gosts
Dos còps per setmana, lo mercat de Brageirac enròda la glèisa
de Nòstra-Dama…
Doas escasenças de se laissar enjaular per son ample e sa
diversitat, sas colors e sos perfums, sas bravas tradicions.
Convit a la passejada suls mercats de nuèch de Cadonh,
Sent-Meard-de-Gurson, Eissijac o Aimet...
Fondadas sus una recèpta simpla, aquelas manifestacions
conéisson un succès vertadièr : un brave ser d’estiu, botatz
de mercadièrs dins un endrech agradiu, perpausatz al public
diversas possibilitats de se restaurar, ajostatz un bocin de
convivialitat e un brin de musica...
A Biron o a Pressinhac-Vic, los mercats fermièrs bòtan en onor
los produchs de femnas e d’òmes apassionats per lor mestièr.
Veiquí, en dirèct e en exclusivitat, lo melhor de las bòrias
del País de Brageirac : cacaus, castanhas, vins, fresas,
melons, fetge gras...
Dins l’encastre de l’Itinérance en val de Dròpt, en agost
2006, Aimet, Eissijac e Cadonh perpausaràn de mercats
medievals onte tot bon cavalièr en cèrca de ripalhas poirà
saborar ipocràs, pastís, curvelets, tòstas e aurelhetas, s’ofrir
una novèla espasa a doas mans tarriblament a la mòda e, quò
vai sens dire, far adobar son armadura carabossada lòrs d’un
recent torneg.
Saborar “en dirèct”
Los taulièrs dels Mercats de Productors de País presentan
nonmàs produchs elaborats, faiçonats, cultivats, mitonats
localament per las e los que los vendan. Del fresc, del
vertadièr, del seriós...
Aicí, òm vend e òm crompa, segur, mas òm pren tanben son
temps, òm sospèsa, òm comenta, en un mot, òm se rencontra e òm
parla… Avètz dit “convivialitat” ?
Laidonc, puslèu que de rejónher son ostal, lo visitor estima
mai se sietar a una taula per tastar, “en dirèct”, un magret,
una carn roja, una lesca de fetge gras, un pescajon e sa
confitura... Amb un gòt d’un jaurèl Brageirac e doas nòtas de
musica !
Pas brava, la vita ? |
