|
D’unas apellacions, amb la poderosa evocacion de lors noms,
fan nàisser coma per magia un frijolament de las papillas.
Òm se plai atal de las citar amb golardisa per çò que son tant
de promesas de sabors, de generositat, de frescor, de redond o
d'ample.
 Brageirac Roge e Rosat
Cabernet Sauvinhon, Cabernet Franc, Merlòt Negre, Còt o
Malbec, veiquí los plants que definisson los AOC Brageirac
roge e rosat. Fins, soples e fruchats, son l'expression del
terraire.
Brageirac Sec
Aquel vin blanc sec es nascut de l'ajustament del Semilhon,
Sauvinhon, Muscadèla, Ondenc e Chenin Blanc. Amb sa rauba
clara e lusenta, fresc e agradablament boquetat, òm lo
reconeis a son ataca nerviosa e sa bona longor en boca.
Còstas de Brageirac Roge
Cabernet Sauvinhon, Cabernet Franc, Merlòt Negre, Còt o
Malbec, balhan als Còstas de Brageirac roges aquela viva color
fosca. Estructurats presentan aròmas de frucha confida coma la
pruna sèca. Lor excepcionala estructura tanica lor balha una
requista aptituda al vielhiment.
Còstas de Brageirac Blanc
Lo Semilhon es lo plant de predileccion d’aquel vin de la
rauba daurada, que marida subrebèlament frescor aromatica e
rondor en boca. Pòt se beure jòune mas pren en vielhir un
ample de remarcar. Los Còstas de Brageirac Blanc se destrian
en tres categorias : mièg-sec, umorós e doç, segon lor riquesa
en sucre.
Mont Ravèl
Semilhon, Muscadèla, amb una larja predominança de Sauvinhon,
veiquí los tres plants que participan a l'elaboracion dels
vins de Mont Ravèl. Los vins d'AOC Mont Ravèl (blancs secs)
son aromatics amb una generosa estructura en boca.
Naut Mont Ravèl
Lo vin blanc de l'AOC Naut Mont Ravèl es fin e suau, amb una
plan granda concentracion. Umorós per çò qu’es sortit de
vendémias pansarilhadas, pòt amb una derogacion èsser liquorós
quand los rasims son botritizats (coma l'AOC Saussinhac).
Còstas de Mont Ravèl
Los vins de l'AOC Còstas de Mont Ravèl son umorós, de granda
complexitat aromatica amb de nòtas floralas.
 Mont Ravèl Roge
Los vins devon venir d’un ajustament dels plants seguents, a
l’exclusion de tot autre :
-Merlòt N representant au minimum 50 % de la totalitat dels
plants ;
-Cabernet-Sauvinhon N ;
-Cabernet Franc N ;
-Còt N ;
La densitat de plantacion deu èsser al minimum de 5000 pès a
l’ectara amb un maximum de 2 m de distància entre los rengs e
de 1 m entre las socas.
L’elevatge dels vins rotges de Mont Ravèl es fixat a quinze
mes al minimum.
L’aprobacion dels vins se fai aprèp la mesa en botelha ; amb
una botelha personalisada, gravada IN MONTE REVELATIONEM
Saussinhac
Lo vin blanc d'AOC Saussinhac es nascut de l'ajustament del
Semilhon, Sauvinhon, Muscadèla, Ondenc e Chenin blanc. Aquel
vin ample e ric, amb sas redoléncias de càcia, de persèc e de
cabrifuèlh, desvolopa amb lo temps una flaira generosa e
complèxa. Umorós per çò que es sortit de vendémias
pansarilhadas, pòt amb una derogacion èsser liquorós quand los
rasims son botritisats (coma l'AOC Naut Mont Ravèl).
Mont Bazalhac
Nascut de l'ajustament de tres plants, Semilhon, Sauvinhon,
Muscadèla, l'AOC Mont Bazalhac es recoltada per vendèmias a la
man e trias successivas, per causir nonmàs los gruns de rasims
tocats per aquela famosa e miraculosa "poiridura nòbla". D'una
fabulosa color daurada que escurzís amb lo temps, lo Mont
Bazalhac, particularament elegant, es dominat per d’aròmas de
mèl, de càcia e de persèc, maiat per de las nuanças d'agrums e
de mirabèlas confits.
Pech Armand
Cabernet Franc, Cabernet Sauvinhon, Còt o Malbec e Merlòt
Negre, veiquí los plants que participan a l'elaboracion de l'apellacion
Pech Armand. Lo gost incomparable del Pech Armand ven de la
particularitat de sa terra apelada sablas e gravas del
Perigòrd que conténon en prigondor una vena d’argila
ferruginosa apelada " Tran ". Lo Pech Armand es un vin de
garda de granda tipicitat, a la gràcia poderosa, de granda
intensitat aromatica.
Roseta
Mai que mai nascut de l’ajustament de tres plants, Semilhon,
Sauvinhon, Muscadèla, l'AOC Roseta es un vin blanc amb una
rauba leugièrament palhada. Umorós, sople e redond, aquel vin
curiós es d'una elegància rara. Se distinguís per son terraire
particular de tèrmes expausats au nòrd de la val.
L'abús d'alcoòl es perilhós per la santat - A beure amb
moderacion
|
|
