Acuèlh  >  On a vu, lu, écouté  > La granda fèsta de l'occitan : la felibrejada

 La granda fèsta de l'occitan : la felibrejada

 


La prumièra felibrejada en Perigòrd se debanèt lo 20 de setembre 1903 a Maruelh sus Bela (24). Aquel jorn, lo president del Bornat pronóncia un discors, saludat per Frederic Mistral e per Pèire Dévoluy, capolier del Felibrige.

Coorganisada per lo Bornat dau Perigòrd e un comitat local creat especialament cada annada, aquela manifestacion se debana dempuèi aquela data dins tots los ranvèrs del Perigòrd.
Es uèi la granda fèsta annadièra trevada per desenats de milièrs de personas vengudas de tots los orizonts. Lo programa comprend un desfilat dels gropes tradicionals, una taulada, una cort d'amor e d'autras manifestacions. Los organisators privilegian l'autenticitat dels costumas, dels instruments de musica e dels mestièrs ancians dins una tòca pedagogica. Aquel agach en darrièr es sens nostalgia. Plan al contrari, es virat resolgudament cap a l’avenidor. A quela ocasion, mas tanben tot lo long de l'annada, lo Bornat dau Perigòrd participa a l'initiacion de la lenga occitana de la mairala a l'universitat. Las generacions novèlas son pas oblidadas !

La felibreja comença plan lèu dins l'annada amb de nombrosas animacions, mai que mai lòrs de las seradas de preparacion de las flors que serviràn a la decoracion. Conferéncias, espectacles, seradas a tèma, son prepausadas per la sauvagarda del patrimòni e de la lenga.
La felibrejada es lo rebat de l'ideal occitan fait de cortesia, de beltat, d'independéncia, un ideal de laïcitat obert sus l'exterior. Sa cort d'amor es lo sovenir de la fin'amors dels trobadors quand la cultura cortesa reconeissiá valor cordiala e saviesa amorosa a las dònas. Participar a una felibrejada uèi, quò es aimar las causas simplas, l'amistat, lo partatge, lo respèct dels autres, la tolerància, aimar lo brave, lo santós.

Dins aquela debuta del sègle XXI, la felibrejada jòga un ròtle important per la defensa e l'illustracion de la lenga d’òc. En sosténer sa lenga, pren part a la batèsta de totas las autras lengas minoritàrias.

En 2003, an festejat lo centenari de la prumièra felibrejada. En rota per la dos centena !

La felibrejada ongan s'es debenada los 4 e 5 de julhet 2009 a Bèlmont de Perigòrd (en français)

La felibrejada 2010 s'es debenada los 2, 3 e 4 de julhèt 2010 al Montinhac

La felibrejada 2013 se debanarà los 5, 6 e 7 de julhèt 2013 a Brageirac


Joan-Claudi DUGROS
 

 
 

Retorn a la pagina d'acuèlh Occitan