Acuèlh  >  Cultura occitana  >  La crotz occitana

 La crotz occitana

 


En tèrmes eraldics, la crotz de Tolosa, o crotz del Lengadòc o enquera crotz occitana, es una crotz grèca (amb las brancas egalas), sas extremitats son en fòrma de ponhada de clau (medievala) e pòrtan caduna 3 pèrlas d’or.
Apareis amb lo sagèl de Ramond VI en 1211 e serà totjorn utilisada puèi per los comtes de Tolosa. S’impausarà dins tot lo ranvèrs tolosan a la debuta del sègle XIII e figurarà a comptar d’aquí sus las armas de la vila de Tolosa, puèi sus las del Lengadòc del sègle XIV al sègle XVIII.
Òm pòt la veire sul logò de la region Miegjorn-Pirenèus, sul blason de Tolosa, e de nombrosas autras vilas, dins las manifestacions culturalas, esportivas, socialas... Quò es la crotz dels comtes de Tolosa, la crotz del Marquesat de Provença, la crotz del Lengadòc, mas òm la tròba tanben en Catalonha, dins la Val d’Aran, dins lo nòrd d’Itàlia e plan mai lonh enquera.
Los ipotèsis sus son origina son divèrsas, qualques còps complementàrias, qualques còps contradictòrias. La recèrca de la significacion simbolica de la crotz e de sas dotze pometas s’inscriu dins la dralha dels mites fondators de l’Umanitat. Al començament, una simpla ròda solara amb dotze rais, cadun boletat a son extremitat, simbolisan los dotze ostals del zodiac. Als sègles XII e XIII, los letrats vesián dins aquela figuracion lo Crist crucifiat entorat de sos dotze apòstols. Coneissèm pas las rasons de la causida facha per los comtes de Tolosa e podèm pas conéisser, per lo moment, l’origina vertadièra de la crotz occitana. Mas fin finala, pauc impòrta son origina : l’essencial es que siá uèi un formidable simbòl d’estacament e d’obertura !

Joan-Claudi DUGROS

Òm pòt consultar lo libre de referéncia sus la question : La croix occitane de Raymond Ginouillac, Institut d’Estudis Occitans de Tarn, 2004
 
 

 
 

Retorn a la pagina d'acuèlh Occitan